Vatn og eldur

Síðara Pétursbréf 3

Dagur Drottins

¹Þetta er nú annað bréfið sem ég skrifa ykkur, þið elskuðu, og í þeim báðum hef ég reynt að halda hinu hreina hugarfari vakandi hjá ykkur. ²Það reyni ég með því að rifja upp fyrir ykkur þau orð, sem heilagir spámenn hafa áður talað, og boðorð Drottins vors og frelsara er postular ykkar hafa flutt. ³Þetta skuluð þið þá fyrst vita, að á síðustu dögum munu koma spottarar er stjórnast af eigin girndum ⁴og segja með spotti: „Hvað verður úr fyrirheitinu um komu hans? Því að síðan feðurnir sofnuðu stendur allt við hið sama eins og frá upphafi veraldar.“ ⁵Viljandi gleyma þeir því að himnar og jörð voru til forðum. Guð skapaði þá með orði sínu og jörðin reis upp úr vatni og hvíldi á vatni. ⁶Þess vegna gekk vatnsflóðið yfir þann heim sem þá var svo að hann fórst. ⁷Eins ætlar Guð með sama orði að eyða með eldi himnunum sem nú eru ásamt jörðinni. Hann mun varðveita þá til þess dags er óguðlegir menn verða dæmdir og tortímast.
⁸En þetta eitt má ykkur ekki gleymast, þið elskuðu, að einn dagur er hjá Drottni sem þúsund ár og þúsund ár sem einn dagur. ⁹Ekki er Drottinn seinn á sér með fyrirheitið þótt sumir álíti það seinlæti, heldur er hann langlyndur við ykkur þar eð hann vill ekki að neinn glatist heldur að allir komist til iðrunar.
¹⁰En dagur Drottins mun koma sem þjófur og þá munu himnarnir líða undir lok með miklum gný, frumefnin sundurleysast í brennandi hita og jörðin og þau verk, sem á henni eru, upp brenna. ¹¹Þar eð allt þetta ferst, þannig ber ykkur að lifa heilögu og guðrækilegu lífi ¹²og bíða eftir degi Guðs og flýta fyrir að hann komi. Þá munu himnarnir leysast sundur í eldi og frumefnin bráðna af brennandi hita. ¹³En eftir fyrirheiti hans væntum við nýs himins og nýrrar jarðar þar sem réttlæti býr.
¹⁴Með því að þið nú, þið elskuðu, væntið slíkra hluta, þá kappkostið að lifa í friði frammi fyrir honum, flekklaus og vammlaus. ¹⁵Álítið langlyndi Drottins vors vera hjálpræðisleið. Þetta er það sem hinn elskaði bróðir okkar, Páll, hefur ritað ykkur eftir þeirri speki sem honum er gefin. ¹⁶Það gerir hann líka í öllum bréfum sínum þegar hann talar um þetta. En í þeim er sumt þungskilið er fáfróðir og staðfestulausir menn rangtúlka, eins og aðrar ritningar, sjálfum sér til tortímingar.
¹⁷Fyrst þið vitið þetta fyrir fram, þið elskuðu, þá hafið gát á ykkur að þið látið eigi dragast með af villu þverbrotinna manna og fallið frá staðfestu ykkar. ¹⁸Vaxið í náð og þekkingu Drottins vors og frelsara Jesú Krists. Honum sé dýrðin nú og til eilífðardags. Amen.

Athugasemdir

[Rósa Aðalsteinsdóttir, 25.2.2008 kl. 20:22]

Sæll Árni minn. Ég var að bíða að einhver myndi verða fyrstur að skrifa athugasemd. Var búin að sjá pistilinn rétt eftir að hann birtist.  Ég mátti til að koma hér inn og segja þér að þetta var magnað svar hjá þér við athugasemd Doctor E. Takk fyrir Guðs orð hreint og ómengað og fyrir hjálpina. Kær kveðja

[Árni þór, 26.2.2008 kl. 22:29]

Kærar þakkir Rósa 

[Sigurður Rósant, 29.2.2008 kl. 23:09]

Pétur skrifar fyrir langa löngu - " jörðin reis upp úr vatni og hvíldi á vatni."

Þessi fullyrðing gengur ekki í dag. Kannski fyrri partur hennar " jörðin reis upp úr vatni ", en ekki seinni parturinn. "hvíldi á vatni."

Það gengur ekki. Eða heldur þú Árni Þór, að Ísland hvíli á vatni?

[Árni þór, 2.3.2008 kl. 20:58]

Einfalt orð Guðs er lifandi vatn

[Árni þór, 2.3.2008 kl. 21:14]

Annars er í sköpunnarsögunni greint á annan hátt frá þessu;

Fyrsta bók Móse 1

 1Í upphafi skapaði Guð himin og jörð.

    2Jörðin var (frummálið segir varð) þá auð og tóm, og myrkur grúfði yfir djúpinu, og andi Guðs sveif yfir vötnunum.

    3Guð sagði: "Verði ljós!" Og það varð ljós.

    4Guð sá, að ljósið var gott, og Guð greindi ljósið frá myrkrinu.

    5Og Guð kallaði ljósið dag, en myrkrið kallaði hann nótt. Það varð kveld og það varð morgunn, hinn fyrsti dagur.

    6Guð sagði: "Verði festing milli vatnanna, og hún greini vötn frá vötnum."  

   7Þá gjörði Guð festinguna og greindi vötnin, sem voru undir festingunni, frá þeim vötnum, sem voru yfir henni. Og það varð svo.

    8Og Guð kallaði festinguna himin. Það varð kveld og það varð morgunn, hinn annar dagur.

Það er auðvelt að sjá þarna að það er vatn yfir festingunni sem Guð nefndi síðan himin, jörðin er í raun umvafin vatni sem nefnist nú himinn

[Rósa Aðalsteinsdóttir, 3.3.2008 kl. 21:46]

Sæll aftur Árni minn. Þakka þér fyrir greinagóð svör um sköpunarverk Guðs. Allt sem Guð skapaði er fullkomið. 

Guð blessi þig.

[Árni þór, 4.3.2008 kl. 01:27]

já sömuleiðis Rósa  

kærar þakkir